मोरङमा नहरमा महिलाको शव फेला

विराटनगर । मोरङको बुढीगंगा गाउँपालिका–७ स्थित सुनसरी–मोरङ सिँचाइ आयोजनाको नहरमा एक महिलाको शव फेला परेको छ।

प्रहरीका अनुसार शुक्रबार बिहान नहरले बगाएर ल्याउँदै गरेको अवस्थामा अन्दाजी ३० देखि ३२ वर्ष उमेरकी महिलाको शव भेटिएको हो। पेटिकोट र ब्लाउज लगाएको अवस्थामा शव फेला परेको भए पनि मृतकको पहिचान खुलेको छैन।

जिल्ला प्रहरी कार्यालय मोरङकी प्रवक्ता डीएसपी कोपिला चुँडालले मृतकको पहिचानका लागि प्रयास भइरहेको बताइन्। उनका अनुसार बिहीबार राति बाढीले बगाएर नहरमा पुगेको हुनसक्ने अनुमान गरिएको छ।

शवलाई पोस्टमार्टमका लागि कोशी अस्पताल लगिएको छ। यसबारे थप अनुसन्धान भइरहेको प्रहरीले जनाएको छ।