बिराटनगर भन्सारमा अवैध कारोबारको ‘सेटिङ’ गर्ने युवक सक्रिय

बिराटनगर / बिराटनगर भन्सार कार्यालयमा अवैध कारोबारको ‘सेटिङ’ गर्ने एक युवक वर्षौंदेखि सक्रिय रहेको खुलेको छ। भारतीय सवारीसाधनको भन्सार काट्ने बिचौलियाको रूपमा काम गर्दै आएका उक्त युवकले सीमामा हुने हरेक गतिविधिमा नजर राखी आर्थिक लाभका लागि अवैध रूपमा सामान ओसारपोसार गर्ने कार्यमा संलग्न रहेको पाइएको हो।

बिराटनगर भन्सार कार्यालयको यात्रु शाखामा दिनभरि देखिने उक्त युवकले भारतबाट बहुमूल्य सामान ल्याउने नयाँ व्यक्तिहरूलाई बढी लक्षित गर्ने गरेको पाइएको छ। सुरुमा उनीहरूलाई अप्ठ्यारोमा पार्ने र त्यसपछि ‘डिल’ गर्ने काम गर्ने उक्त युवकले कुरा नमिलेमा वा आफ्नो स्वार्थ पूरा नभएमा नजिकैको सुरक्षाकर्मीलाई उक्साएर सामान जफत गर्न लगाउने गरेको स्रोतले बताएको छ।

दिनभरि भन्सारको यात्रु शाखामा बस्ने भएकाले उनलाई भन्सार कार्यालयको कर्मचारी नै भनेर धेरै जना भ्रम मा पर्ने गरेको छ।

फिल्डमा खटिने सुरक्षाकर्मीदेखि लिएर सुरक्षा निकायका उच्च ओहोदाका कर्मचारीहरूसम्मसँग नियमित सम्पर्कमा रहने उक्त युवकले आफ्नो कुरा नमान्ने सुरक्षाकर्मीलाई धम्की दिने र ‘सर्वगराइदिन्छु’ भनी त्रास सिर्जना गर्ने गरेको एक सुरक्षाकर्मीले नाम नखुलाउने शर्तमा जानकारी दिए।

“उसले दुईजना पत्रकारको सहयोग लिएर आफ्नो कुरा नमान्ने सुरक्षाकर्मीको गुनासो डीआईजी, एसपी, डीएसपी र इन्स्पेक्टरहरूलाई फोन गरेर अप्ठ्यारोमा पार्ने काम गर्छ,” उनले भने।

सशस्त्र प्रहरीको बराह बाहिनीमा डीआईजी अञ्जनी कुमार पोखरेल हुँदा नाकामा कडाइ भएको बेला इमान्दारीपूर्वक काम गर्ने धेरै सशस्त्र प्रहरीहरूलाई उक्त युवकले अप्ठ्यारोमा पारेको थियो। त्यतिमात्र नभई रानी गुल्ममा इमान्दार गुल्मपतिको पनि दैनिक गुनासो डीआईजी समक्ष पुर्याउने गरेको थियो।

बिस्तारै उनको मनसाय बुझेपछि त्यस्ता कार्यमा केही रोक लागे पनि अहिले सोही क्रम चरममा पुगेको स्रोतले बताएको छ।

उक्त युवक विराटनगर स्थित नेपाल पत्रकार महासंघमा पनि बेलाबेला धाउने गरेका छन्। यसबाट पत्रकारहरूसँग राम्रो सम्बन्ध रहेको देखाउन सजिलो हुने उद्देश्य रहेको बुझिएको छ।

युवकको कुरा सुनेर हिड्ने केही सुरक्षाकर्मीहरूले पनि राम्रै आर्थिक लाभ पाउने गरेको छ।

उक्त युवकको पूर्ण विवरण सहित अर्को अंशमा प्रकाशन गरिने छ । क्रमश…