धरान उपमहानगरपलिकाका मेयर हर्क साम्पाङ राईले पदबाट राजीनामा

विराटनगर । धरान उपमहानगरपालिकाका मेयर हर्क साम्पाङ राईले पदबाट राजीनामा दिएका छन्। आगामी फागुन २१ गते हुने प्रतिनिधिसभा सदस्यको निर्वाचनमा उम्मेदवारी दिने तयारीका लागि उनले आइतबार (आज) मेयर पदबाट राजीनामा दिएको हो।

साम्पाङले आफ्नो राजीनामा पत्र उपप्रमुख समक्ष बुझाएका छन्। हस्ताक्षरित राजीनामा पत्रमा उनले उल्लेख गरेका छन्:
“यही २०८२/११/२१ गते हुन गइरहेको प्रतिनिधि सभाको निर्वाचनमा उम्मेदवार हुनका लागि संविधानको धारा २१६ को उपधारा ८ (क) बमोजिम नगरप्रमुखको पदबाट राजीनामा दिएको छु।”

राजीनामा दिएको दिनकै दिन काठमाडौंका मेयर बालेन शाहले पनि पदबाट राजीनामा दिएका थिए।
धरानमा निर्वाचित मेयरको पद खाली भएपछि आगामी स्थानीय तह व्यवस्थाअन्तर्गत उपप्रमुख/उपमेयरको भूमिका र प्रशासनिक प्रक्रिया अनुकूल अघि बढ्नेछ।

धरान उपमहानगरपालिकामा हर्क साम्पाङले आफ्नो कार्यकालमा विभिन्न विकास आयोजनामा जोड दिएका थिए। अब उनले प्रतिनिधिसभा सदस्यको उम्मेदवारी दिएपछि राष्ट्रिय तहको राजनीतिमा सक्रिय भूमिका निर्वाह गर्ने आशा व्यक्त गरिएको छ।