चलचित्र ‘बुकी’को फर्स्टलुक पोस्टर सार्वजनिक, २०२६ भित्र प्रदर्शनको तयारी

विराटनगर । निर्देशक मोहन केसीको निर्देशनमा निर्माण भएको नेपाली चलचित्र **‘बुकी’**को फर्स्टलुक पोस्टर सार्वजनिक गरिएको छ। निर्माण पक्षले शनिबार पोस्टर सार्वजनिक गर्दै चलचित्रको आधिकारिक सुरुवातको संकेत दिएको हो।

सार्वजनिक पोस्टरमा बुकी फूललाई केन्द्रविन्दुमा राखिएको छ। हरियाली चौरमा एक पुरुषसहित सात महिला भलिबल खेलिरहेका दृश्यमार्फत चलचित्रको परिवेश र कथावस्तुको झलक देखाइएको छ। बुकी फूल विशेषगरी हिमाली क्षेत्रका पाटनमा वर्षायाममा फुल्ने प्राकृतिक फूल हो, जसले चलचित्रको नामसँगै कथामा पनि विशेष महत्त्व राख्ने अनुमान गर्न सकिन्छ।

चलचित्रका कार्यकारी निर्मातामा प्रकाश आले र राजन केसी रहेका छन् भने निर्माताहरूमा लक्ष्मण सापकोटा, अमिशा काउचा थापा, रमेश थापालगायत रहेका छन्।

‘बुकी’ चलचित्रको छायांकन काठमाडौं, पोखरा र बाग्लुङको ढोरपाटन क्षेत्र लगायत विभिन्न प्राकृतिक सुन्दरतायुक्त स्थानहरूमा गरिएको छ। यद्यपि, चलचित्रको प्रदर्शन मिति तोकिएको छैन, तर निर्माण पक्षले चलचित्रलाई सन् २०२६ भित्र सार्वजनिक गर्ने योजना बनाएको जनाएको छ।