बंगालको खाडीको प्रभावले नेपालमा मनसुन सक्रिय, केही स्थानमा भारी वर्षाको सम्भावना

विराटनगर । बंगालको खाडीबाट आएको जलवाष्पयुक्त हावाको प्रभावले नेपालका विभिन्न भागमा मनसुन सक्रिय बनेको छ। जल तथा मौसम विज्ञान पूर्वानुमान महाशाखाका अनुसार, हाल मनसुन न्यूनचापीय रेखा आफ्नो सामान्य स्थान वरिपरि रहेकाले देशभर आंशिकदेखि पूर्ण बदली भएको छ।

महाशाखाले दिएको जानकारीअनुसार, आज शुक्रबार दिउँसो देशभर आंशिकदेखि पूर्ण बदली रहनेछ भने सबै प्रदेशका पहाडी क्षेत्रमा हल्कादेखि मध्यम वर्षाको सम्भावना छ। साथै कोशी, गण्डकी र सुदूरपश्चिम प्रदेशका केही स्थानमा भारी वर्षा हुन सक्ने अनुमान गरिएको छ।

आज राति पनि देशभर आंशिकदेखि सामान्य बदली रहनेछ। कोशी र सुदूरपश्चिम प्रदेशका एक–दुई स्थानमा भारी वर्षा पर्ने सम्भावना रहेको महाशाखाले जनाएको छ।

महाशाखाले निरन्तरको वर्षाका कारण पहिरो, गेग्रान बग्ने तथा ठूला–साना नदी र खोलाहरूको जलस्तर बढ्ने जोखिम रहेकाले विशेष सतर्कता अपनाउन आग्रह गरेको छ। वर्षाबाट यातायातमा समेत असर पर्न सक्ने भएकाले आवश्यक पूर्वतयारी गर्न सबैलाई सचेत गराइएको छ।