चन्द्रकुबेर खापुङ नेपाल प्रहरीको नयाँ आइजिपी नियुक्त

विराटनगर । सरकारले नेपाल प्रहरीको प्रहरी महानिरीक्षक (आइजिपी)मा चन्द्रकुबेर खापुङलाई नियुक्त गर्ने निर्णय गरेको छ। शुक्रबार बसेको मन्त्रिपरिषद् बैठकले खापुङलाई आइजिपी बनाउने निर्णय गरेको स्रोतले जनाएको हो।

खापुङ हाल एआइजीका रूपमा केन्द्रीय अनुसन्धान ब्युरो (सिआइबी)का प्रमुख हुन्। अहिलेका प्रहरी प्रमुख दीपक थापा भदौ १८ गते अवकाशमा जाने भएकाले सो अवसरमा खापुङ नेपाल प्रहरीको ३२औं आइजिपी बन्नेछन्।

तेह्रथुममा जन्मिएका खापुङले जेन्डर स्टडिजमा स्नातकोत्तर र कानुनमा स्नातक गरेका छन्। उनी २०५२ कात्तिक २७ गते प्रहरी निरीक्षकका रूपमा सेवामा प्रवेश गरेका थिए। करिब तीन दशक लामो सेवाकालमा खापुङले मोरङ, धरान, काठमाडौं उपत्यका लगायत विभिन्न जिम्मेवारी सम्हाल्दै आएका छन्।

प्रहरी सेवामा रहँदा उनले इटाली, भियतनाम, चीनलगायत देशमा तालिम लिएका छन्। संयुक्त राष्ट्रसंघको शान्ति मिसनअन्तर्गत दुईपटक हाइटीमा समेत सेवाप्रदाय गरेका खापुङ प्रबल जनसेवा श्रीसहित १७ पटकसम्म विभिन्न पदक र पुरस्कृत भइसकेका छन्।

नयाँ प्रहरी विधेयक कार्यान्वयनमा नआए खापुङ करिब तीन महिनामात्रै प्रहरी प्रमुख रहनेछन्। प्रहरी नियमावलीअनुसार उनी ३० वर्षे सेवा हदका कारण मंसिर २३ पछि अवकाशमा जानुपर्ने हुन्छ। तर विधेयक पारित भएमा उनको कार्यकाल बढ्ने सम्भावना पनि रहेको छ।