झापामा स्वीमिङ पुलमा एक युवक मृत फेला

विराटनगर । बिर्तामोड नगरपालिका–२ स्थित ग्रीन पार्कको स्वीमिङ पुलमा एक युवक मृत फेला परेका छन्। मृतक बिर्तामोड–३ का ३३ वर्षीय प्रकाश प्रसाईँ रहेको जिल्ला प्रहरी कार्यालय झापाले जनाएको छ।

प्रहरी नायब उपरीक्षक (डीएसपी) खगेन्द्रबहादुर खड्काका अनुसार प्रसाईँ शुक्रबार दिउँसो करिब ३ः०० बजे आफ्ना साथी बिर्तामोड–१० का केशव शिवाकोटीसँग घुम्न र पौडी खेल्न पार्क पुगेका थिए। तर, पौडी खेल्ने क्रममा उनी मृत्यु भएको बताइएको छ।

पार्क सञ्चालक जीवन ढुङ्गानाले राति करिब ८ः०० बजे मात्र प्रहरीलाई घटनाबारे जानकारी गराएका थिए। घटनाको जानकारी पाएपछि इलाका प्रहरी कार्यालय अनारमनीबाट प्रहरी टोली पुगेर अनुसन्धान सुरु गरिएको झापा प्रहरीले जनाएको छ।

हाल मृतकको मृत्युको कारणबारे थप अनुसन्धान जारी रहेको प्रहरीले जनाएको छ।