विराटनगरमा फोटोग्राफर संघ मोरङद्वारा रक्तदान कार्यक्रम, ३५ पिन्ट रगत संकलन

विराटनगर । फोटोग्राफर संघ मोरङले विराटनगरको महेन्द्र चोकमा रक्तदान कार्यक्रम आयोजना गरेको छ ।

संघका मोरङ अध्यक्ष पुरन राईका अनुसार कार्यक्रममा ३५ पिन्ट रगत संकलन गरिएको छ । रक्तदाता सहभागीहरूलाई संघका अध्यक्ष राईले प्रशंसा पत्र प्रदान गरेका थिए ।

स्थानियबासी तथा फोटोग्राफरहरूले सक्रिय रुपमा रक्तदान गरेको कार्यक्रममा ‘रक्तदान, जीवन दान’ भन्ने मूल नाराका साथ कार्यक्रम सञ्चालन गरिएको थियो ।

रक्त संचार केन्द्र विराटनगरमा देखिएको रगत अभावलाई न्यूनीकरण गर्ने उद्देश्यले रक्तदान कार्यक्रम आयोजना गरिएको अध्यक्ष राईले बताए । उनले रगत नपाएर कसैको ज्यान अकालमै जान नपरोस् भन्ने सोचका साथ संघले यस्तो अभियान अघि बढाएको उल्लेख गरे ।