सोनापुर मिनरल एण्ड आयलले बिजुली बक्यौता तिरेर आपूर्ति पुनः सञ्चालन

बिराटनगर । दाङको घोराहीस्थित सोनापुर मिनरल एण्ड आयल प्रालिले लामो समयदेखि बाँकी रहेको बिजुली बक्यौता बुझाएपछि उद्योगको विद्युत् आपूर्ति पुनः सुरु गरिएको छ।

मंगलबार उद्योगले पहिलो किस्ताका रूपमा रु ८६ लाख ३० हजार रकम बुझाएपछि काटिएको लाइनबाट सोही दिनदेखि विद्युत् आपूर्ति पुनः सुरू गरिएको नेपाल विद्युत् प्राधिकरणले जनाएको छ।

प्राधिकरणका अनुसार उद्योगको कुल रु २४ करोड २९ लाख ९९ हजार बक्यौता रहेको थियो। उक्त रकमलाई प्राधिकरणले २८ किस्तामा विभाजन गरेको छ।

उद्योगले पहिलो किस्ता बुझाएसँगै प्राधिकरणले बाँकी किस्ताहरू तोकिएको समयभित्र बुझाउने सर्तमा विद्युत् आपूर्ति सुचारु गरेको जनाएको छ।