‘आ बाट आमा’ मा उषा उप्रेती अनुबन्ध, भदौदेखि छायांकन सुरु

विराटनगर । निर्देशक चन्द्र पन्तको निर्देशनमा बन्ने तयारीमा रहेको नयाँ नेपाली फिल्म ‘आ बाट आमा’ मा मोडल उषा उप्रेती अनुबन्ध भएकी छन्। बुधबार उनलाई फिल्मको मुख्य भूमिकामध्ये एकका लागि अनुबन्ध गरिएको हो। यद्यपि, उनले निभाउने भूमिका भने सार्वजनिक गरिएको छैन।

यसअघि फिल्ममा अभिनेता पल शाह, अभिनेत्री सिमरन पन्त, विपना थापा र दक्षिण भारतीय फिल्मका चर्चित अभिनेता प्रदीप रावत अनुबन्ध भइसकेका छन्।

आर्या इन्टरटेन्मेन्टको ब्यानरमा निर्माण हुने यस फिल्मको छायांकन भदौ महिनादेखि सुरु हुने निर्माण टिमले जनाएको छ। अन्य कलाकार र प्राविधिक टोलीको नाम पनि छिट्टै सार्वजनिक गरिने बताइएको छ।

फिल्मको वितरण अधिकार आरआर फिल्म्सले लिएको छ। यसका लागि निर्माण पक्ष र आरआर फिल्म्सका प्रतिनिधि रोहित कट्टेल र रत्न श्रेष्ठबीच हालै सम्झौता भएको हो।

‘आ बाट आमा’ आउँदो फागुन १५ गते देशभर एकसाथ प्रदर्शनमा आउने तय गरिएको छ।