सुनको मूल्यमा नयाँ कीर्तिमान, तोलाको २ लाख नाघ्यो

विराटनगर । नेपाली बजारमा शुक्रबार सुनको मूल्यले नयाँ रेकर्ड कायम गरेको छ। नेपाल सुनचाँदी व्यवसायी महासंघका अनुसार छापावाल सुन तोलाको दुई लाख ६०० रुपैयाँ पुगेको छ।

यसअघि साउन २३ गते तोलाको एक लाख ९९ हजार ४०० रुपैयाँमा कारोबार भएको सुन नै उच्च मूल्य थियो। बिहीबार पनि सोही मूल्यमा सुन कारोबार भएको थियो। तर शुक्रबार मात्र एकैदिनमा तोलामा १ हजार २०० रुपैयाँले वृद्धि भई मूल्य दुई लाख नाघेको हो।

सुनसँगै चाँदीको मूल्य पनि बढेको छ। बिहीबार तोलाको २ हजार ३५५ रुपैयाँमा कारोबार भएको चाँदी शुक्रबार तोलाको २ हजार ३६० रुपैयाँमा पुगेको महासंघले जनाएको छ।