आज देशभर बदली, केही स्थानमा मध्यम वर्षाको सम्भावना

विराटनगर । हाल मनसुनको न्यून चापीय रेखा पूर्वतर्फ सरदर स्थानभन्दा उत्तरतर्फ र पश्चिमतर्फ सरदर स्थानको आसपासमा अवस्थित रहेको मौसम पूर्वानुमान महाशाखाले जनाएको छ।

महाशाखाका अनुसार आज दिउँसो देशभर साधारणतया बदली रहनेछ। कर्णाली र सुदूरपश्चिम प्रदेशको तराई तथा पहाडी भू–भागका केही स्थानहरूमा मध्यम वर्षा हुने सम्भावना छ। त्यस्तै, बागमती र गण्डकी प्रदेशसहितका अन्य पहाडी भू–भागका थोरै स्थानहरूमा र तराईका एक–दुई स्थानमा समेत वर्षा हुने अनुमान गरिएको छ।

आज राति पनि देशभर आकाश बदली रहने पूर्वानुमान गरिएको छ। राति सबै प्रदेशका पहाडी भू–भागका केही स्थान र तराईका थोरै स्थानमा मध्यम वर्षा हुने सम्भावना रहेको महाशाखाले जानकारी दिएको छ।